Instagram mohon përdorimin e mikrofonëve të telefonit për gjurmimin e përdoruesve

@pixabay

Drejtori ekzekutiv i Instagram, Adam Mosseri, ka hedhur poshtë pretendimet se platforma përdor mikrofonët e telefonave për të monitoruar përdoruesit dhe për të targetuar reklamat.

Ai theksoi se një praktikë e tillë do të ishte një shkelje e madhe e privatësisë, dhe gjithashtu do të ishte e lehtë për t’u vënë re përmes ndezjes së dritës së mikrofonit ose për shkak të shkarkimit më të shpejtë të baterisë, raporton TechCrunch.

Mosseri shpjegoi se reklamat dhe sugjerimet për përdoruesit bazohen kryesisht në informacionet që reklamuesit ndajnë për vizitorët e tyre dhe në analizën algoritmike të interesave të përdoruesve të ngjashëm. Kështu, platformat e Meta-s mund të krijojnë reklama të synuara pa pasur nevojë për të përgjuar bisedat private.

Ai shtoi se algoritmet tani kombinohen me psikologjinë njerëzore dhe rastësinë, gjë që ndonjëherë krijon iluzionin se Instagram “po lexon mendjet” e përdoruesve. Meta, kompania amerikane që zotëron Facebook dhe Instagram, njoftoi gjithashtu se do të ofrojë reklama dhe sugjerime bazuar në ndërveprimet e përdoruesve me asistentin e saj dixhital Meta AI.

Ky ndryshim do të nisë më 16 dhjetor, dhe përdoruesit do të njoftohen gradualisht, duke filluar nga 7 tetori. Përditësimi do të jetë fillimisht në Mbretërinë e Bashkuar dhe Bashkimin Evropian, sipas kontrolleve standarde rregullatore. TechCrunch nënvizon se Instagram nuk ka nevojë të përdorë mikrofonin për të targetuar reklamat, pasi disponon tashmë sasi të mëdha të dhënash nga përdoruesit.