Gjykata konfirmon përjashtimin e nxënësve ndërkufitarë nga shkollat e Gjenevës

Nxënësit nga Franca përjashtohen nga shkollat e Gjenevës

Dhoma Kushtetuese e Gjykatës së Drejtësisë së Gjenevës ka vendosur në favor të kantonit në çështjen që lidhet me përjashtimin e nxënësve ndërkufitarë nga shkollat publike të Gjenevës, përcjell albinfo.ch.

Gjykata ka hedhur poshtë 112 ankesa, të paraqitura nga nxënës që banojnë në Francë dhe që kërkonin të ndjeknin arsimin në institucionet shkollore të kantonit të Gjenevës.

Vendimi lidhet me ndryshimet rregullatore të miratuara në qershor 2025 nga Këshilli i Shtetit i Gjenevës, të cilat kufizojnë ndjekjen e shkollave publike – nga arsimi fillor deri në atë të mesëm të lartë – vetëm për fëmijët që banojnë në territorin e kantonit.

Dhoma Kushtetuese vlerëson se autoritetet kantonale kanë vepruar në përputhje me ligjin, duke zbatuar parimin e arsimit të bazuar në vendbanimin e nxënësit.

Sipas gjykatës, personat që nuk jetojnë në Zvicër nuk mund të pretendojnë të drejtën për arsim falas në këtë vend.

---