Parlamenti kritikon ashpër kushtet e paraburgimit në Vaud

Raport parlamentar kritikon ashpër kushtet e paraburgimit në burgjet e Zvicrës Perëndimore

Një raport i ri i Komisionit për Vizitat në Burgje të Këshillit të Madh të kantonit Vaud nxjerr në pah probleme serioze dhe të përsëritura në kushtet e paraburgimit në burgjet e këtij kantoni. Gjetjet e komisionit vijnë pas vizitave në disa institucione korrektuese dhe vetëm pak ditë pas një kryengritjeje të dhunshme në një burg në kantonin Fribourg, çka ka rritur shqetësimet për gjendjen e sistemit penitenciar në Zvicrën Perëndimore, përcjell albinfo.ch.

Sipas raportit vjetor, mbipopullimi mbetet një nga problemet kryesore. Veçanërisht alarmante është situata në burgun Bois-Mermet, ku kapaciteti është tejkaluar me 166 për qind, si dhe në burgun Croisée, me 143 për qind mbipopullim. Komisioni thekson se kjo gjendje ndikon negativisht si te të burgosurit ashtu edhe te personeli, duke rritur presionin, stresin dhe rreziqet në menaxhimin e përditshëm të burgjeve. Për këtë arsye, kërkohen zgjidhje sa më të shpejta nga autoritetet kompetente.

Raporti vë gjithashtu theks të veçantë te kujdesi mjekësor për personat me çrregullime psikike. Sipas komisionit, numri i rasteve të tilla është në rritje “në mënyrë shqetësuese” dhe përbën një “sfidë të madhe” për ofrimin e mbështetjes terapeutike të përshtatshme brenda sistemit të vuajtjes së dënimit. Mungesa e burimeve dhe e strukturave të specializuara e vështirëson edhe më tej trajtimin adekuat të këtyre personave.

Një tjetër problem serioz lidhet me qëndrimin e zgjatur të të ndaluarve në burgjet e policisë. Komisioni ka konstatuar raste ku persona janë mbajtur deri në 62 ditë, ndonëse ligji parashikon një kohë maksimale prej vetëm 48 orësh. Sipas raportit, kjo praktikë bie ndesh me funksionin ligjor të këtyre ambienteve, të cilat janë të destinuara vetëm për ndalim të përkohshëm.

Në përfundim, Komisioni për Vizitat në Burgje u bën thirrje autoriteteve që të ndërmarrin masa urgjente, në mënyrë që burgjet e policisë të rikthehen në qëllimin e tyre fillestar dhe të përmirësohen kushtet e paraburgimit, duke garantuar respektimin e standardeve ligjore dhe humane për trajtimin e personave të ndaluar.

---