Orteku i borës bllokon rrugën drejt Lötschbergut

Bllokim total në Lötschberg pas ortekut

Një ortek ka mbuluar rrugën kantonale që çon drejt Autoverladit të BLS-së në tunelin e Lötschbergut, duke shkaktuar ndërprerje të menjëhershme të qarkullimit rrugor dhe hekurudhor, përcjell albinfo.ch.

Siç njofton kompania BLS në faqen e saj zyrtare, transporti i automjeteve me tren ndërmjet Kanderstegut dhe Goppensteinit është pezulluar. Po ashtu, edhe SBB ka konfirmuar se në linjën Frutigen – Brig, qarkullimi i trenave është i kufizuar në segmentin ndërmjet Goppenstein dhe Hohtenn.

Policia Kantonale e Valais-it ka bërë të ditur se alarmi është pranuar në orën 11:40, pasi një ortek ka rënë në rrugën kantonale pranë galerisë Rotlaui. Ekipet e mirëmbajtjes dhe pastrimit të rrugëve ndodhen tashmë në terren dhe po vlerësojnë situatën.

Aktualisht, autoritetet nuk kanë dhënë detaje të tjera, ndërsa nuk përjashtohet mundësia që persona të jenë prekur nga orteku. Rruga mbetet e mbyllur deri në një njoftim të dytë, ndërkohë që edhe qarkullimi i trenave është ndërprerë përkohësisht, sipas BLS-së.

Autoritetet u bëjnë thirrje udhëtarëve të shmangin zonën dhe të ndjekin njoftimet zyrtare për zhvillime të mëtejshme. /Albinfo.ch

---