Qeveria zvicerane plan për të mbështetur verën vendase – industria reagon ashpër

Në Zvicër, konsumi i verës ka rënë vitet e fundit, ndërsa prodhuesit vendas përballen me konkurrencë të fortë nga verërat e importuara

Qeveria e Zvicrës po planifikon të ndryshojë mënyrën se si importohet vera, me qëllim që të mbështesë prodhuesit vendas, por propozimi ka shkaktuar kritika nga tregtarët e verës.

Aktualisht, importi i verës bëhet sipas parimit “kush vjen i pari, shërbehet i pari”, brenda një kuote vjetore me tarifa më të ulëta.

Sipas planit të ri, këto kuota do t’u jepen kryesisht kompanive që gjithashtu blejnë dhe përpunojnë rrush zviceran.

Qeveria thotë se kjo do të forcojë pozicionin e vreshtarëve zviceranë, të cilët më pas mund të transferojnë certifikatat e importit te tregtarët, transmeton albinfo.ch.

Megjithatë, tregtarët paralajmërojnë se ndryshimi mund të ketë pasoja të mëdha për tregtinë e verës. Sipas tyre, sektori i tregtisë punëson rreth dhjetë herë më shumë njerëz se sa prodhimi i verës dhe problemi nuk është gjithmonë te konkurrenca, por te fakti se disa verëra zvicerane nuk arrijnë të shiten në treg.

Shoqata Zvicerane e Tregtisë së Verës e ka cilësuar propozimin si të shkëputur nga realiteti i tregut, duke argumentuar se rënia e konsumit të verës lidhet me ndryshimet në stilin e jetës dhe se industria duhet të përshtatet me inovacion dhe marketing më të mirë, jo me mbrojtje shtetërore.

Në Zvicër, konsumi i verës ka rënë vitet e fundit, ndërsa prodhuesit vendas përballen me konkurrencë të fortë nga verërat e importuara.

---