Mesha “The Armed Man”, kushtuar viktimave të luftës në Kosovë

“The Armed Man” është një vepër e njohur artistike muzikore skenike që bart një porosi kundër luftës. Ajo u kushtohet viktimave të luftës së Kosovës dhe është realizuar në periudhën menjëherë pas asaj lufte

Kori kamertal i komunës Neuenkirchen dhe Rekum, nën drejtimin e Hauke Scholten, më 11 tetor do ta shfaqë në kishën e Neuenkirchen-it meshën “The Armed Man” të autorit anglez Karl Jenkins.

“The Armed Man” është një vepër e njohur artistike muzikore skenike që bart një porosi kundër luftës. Ajo u kushtohet viktimave të luftës së Kosovës dhe është realizuar në periudhën menjëherë pas asaj lufte.

Është fjala për një meshë mbi paqen në mes të popujve dhe religjioneve të ndryshme, e cila në sfondin e problemit aktual të refugjatëve merr edhe një dimension të ri, shkruan weserkurier.de. Ajo është shprehje e dëshirës për një bashkëjetesë paqësore dhe me respekt të ndërsjellë.

Mbi bazën e meshës së vjetër katolike, kompozitori ka ndërthurur tekste nga kultura dhe kohë të ndryshme, ka shfrytëzuar këngë të vjetra luftërash dhe i ka plotësuar ato me muzikën e vet. Me këtë veprim ai ka dashur të apelojë që ta lëmë mbrapa mijëvjeçarin e luftërave, transmeton albinfo.ch. Sipas tij duhet forcuar bashkësia e besimtarëve, brenda të cilës individët dhe besimi i tyre ashtu si dhe diversiteti i besimeve trajtohen si të barabarta.

Kompozitori synon të na shtyjë të vendosim gurthemelet e mijëvjeçarit të ri të paqes, ashtu siç edhe është bërë me vënien në skenë të kësaj pjese artistike tashmë afër 1000 herë në 20 vende të botës. Ai e ka kuptuar se kjo që ne bëjmë sot do të ketë një ndikim në njëmijë vitet e ardhshme. “Mbase frytet e saj do të piqen vetëm atëherë kur ne nuk do të mundemi t`i vjelim më, por megjithatë ia vlen që t`i mbjellim, me shpresën se fëmijëve tanë do t`ua dhurojmë një të ardhme në paqe”, ka thënë Scholten.

Koncerti (Mesha “The Armed Man”) jepet në Michaelskirche, Landstrasse 71 dhe fillon nga ora 17.00. Hyrja është falas. Në dalje nga salla ata që dëshirojnë mund të dhurojnë para në të mirë të punës së shoqatës muzikore kishtare “musica sacra”, e cila ka mundësuar një koncert sikur ky.