Remitencat nga diaspora kapin shifrën prej 984 milionë eurosh

Gjermania dhe Zvicra mbajnë peshën kryesore të parave nga diaspora

Mërgimtarët kanë vazhduar të luajnë një rol të rëndësishëm në ekonominë e Kosovës, duke dërguar 984.1 milionë euro remitenca gjatë tetë muajve të parë të vitit 2026. Shuma paraqet një rritje prej 6.74 për qind në krahasim me periudhën e njëjtë të vitit 2025, sipas të dhënave preliminare të Bankës Qendrore të Kosovës, transmeton albinfo.ch.

Pjesën më të madhe të këtyre mjeteve vazhdojnë ta sigurojnë mërgimtarët nga Gjermania dhe Zvicra. Gjermania mbetet burimi kryesor i remitencave, me një pjesëmarrje që në periudha të ndryshme ka variuar rreth 35 deri në 44 për qind të totalit.

Në vendin e dytë renditet Zvicra, e cila zakonisht kontribuon me rreth 16 deri në 24 për qind të remitencave të përgjithshme.

Kontribut të rëndësishëm japin edhe diaspora në Shtetet e Bashkuara, Austri, Belgjikë, Francë, Itali, Suedi dhe Mbretërinë e Bashkuar, ndonëse në përmasa më të vogla krahasuar me Gjermaninë dhe Zvicrën.

Shifra prej afro një miliard eurosh në vetëm tetë muaj tregon peshën e madhe që remitencat vazhdojnë të kenë për familjet dhe ekonominë e Kosovës. /Albinfo.ch

---