Çmimet e karburanteve në Zvicër nuk pritet të ulen së shpejti, pavarësisht rifillimit të pjesshëm të transportit të naftës përmes Ngushticës së Hormuzit.
Sipas ekspertëve, kapacitetet e kufizuara të rafinimit dhe vështirësitë në transportin e karburanteve po pengojnë uljen e çmimeve.
Një tjetër faktor është niveli historikisht i ulët i ujit në lumin Rin, përmes të cilit transportohet rreth gjysma e karburantit për transportin rrugor në Zvicër.
Ekspertët theksojnë se ulja e çmimit të naftës bruto nuk reflektohet menjëherë te pompat e derivateve, ndaj konsumatorët zviceranë do të duhet të presin për një lehtësim të mundshëm të çmimeve.
