Zvicra po shqyrton vendosjen e më shumë se 120 semaforëve në hyrjet e autostradave, me qëllim lehtësimin e qarkullimit gjatë orëve të pikut, raporton gazeta Le Matin Dimanche.
Masa synon të zvogëlojë bllokimet në trafik pa ndërtuar rrugë, tunele apo ura të reja. Sipas raportimit, kolonat në rrugët zvicerane u rritën me 20 për qind gjatë vitit 2025, duke prekur veçanërisht zonat urbane dhe rajonin e Plateau-së.
Semaforët mundësojnë hyrjen e automjeteve në autostradë në intervale të kontrolluara, për të parandaluar mbingarkesën. Megjithatë, kjo mund të shkaktojë vonesa në rrugët që çojnë drejt hyrjeve të autostradave.
Aktualisht, në Zvicër janë në funksion 15 instalime të tilla, ndërsa autoritetet po shqyrtojnë mbi 120 lokacione të reja, kryesisht në rajonin e Cyrihut, në Bazel dhe në Zvicrën frankofone.
Plani po kritikohet nga disa qytete dhe kantone, të cilat ankohen për mungesën e konsultimeve paraprake.
