Operacioni u zhvillua të dielën në mëngjes, në zonën e El Guanos, ku qindra migrantë po qëndronin në strehimore të improvizuara, pasi kampet e tjera në plazhet përreth ishin çmontuar më herët.
Policia spanjolle, e shoqëruar nga ushtarë, mbërriti në zonë pak pas orës 08:00. Migrantët u transportuan me autobusë drejt qendrave të pritjes, ndërsa ekipet e pastrimit nisën punën në hapësirën ku ishte ngritur kampi dhe në plazhin përreth. Disa persona u larguan drejt kodrave për të shmangur transportimin me autobusë.
Kampi ishte krijuar pas një fluksi të madh migrantësh më 30 dhe 31 korrik, kur më shumë se 70 mijë persona mbërritën në Ceuta nga Maroku, sipas raportimit të agjencive të lajmeve.
Shumica u kthyen në Marok brenda pak ditësh, por mijëra të tjerë mbetën në enklavën spanjolle, duke fjetur në rrugë dhe në plazhe.
Mbërritja masive, gjatë së cilës humbën jetën dhjetëra persona, shkaktoi tensione të forta politike në Madrid dhe në Bashkimin Evropian.
Mbreti Felipe VI dhe mbretëresha Letizia pritet të vizitojnë Ceutën të martën, në një udhëtim të koordinuar me qeverinë spanjolle. Të mërkurën, ata planifikojnë të vizitojnë edhe Melillën, një tjetër enklavë spanjolle në Afrikën e Veriut.
Kjo do të jetë vizita e parë e një monarku spanjoll në të dyja qytetet që nga nëntori i vitit 2007, kur mbreti i atëhershëm Juan Carlos vizitoi Ceutën dhe Melillën, duke shkaktuar një krizë diplomatike me Marokun.
Maroku pretendon sovranitetin mbi të dyja enklavat, të cilat Spanja i administron si pjesë të territorit të saj.
