Policia e Kosovës ka realizuar ekstradimin e dy shtetasve kosovarë nga Gjermania dhe Zvicra, të cilët kërkoheshin nga institucionet e drejtësisë së Kosovës përmes INTERPOL-it. Operacionet u zhvilluan më 13 dhe 14 tetor 2026, në koordinim me autoritetet përkatëse dhe institucionet e drejtësisë, përcjell albinfo.ch.
Sipas njoftimit të Policisë së Kosovës, ekstradimi i parë u realizua më 13 tetor, kur një shtetase kosovare u kthye nga Gjermania. Ajo kërkohej për veprat penale që lidhen me blerjen, posedimin, shpërndarjen dhe shitjen e paautorizuar të narkotikëve, substancave psikotrope dhe substancave analoge.
Pas mbërritjes në Kosovë, e dyshuara iu dorëzua njësive përkatëse policore në rajonin e Pejës, për vazhdimin e procedurave ligjore.
Një ditë më vonë, më 14 tetor, nga Zvicra u ekstradua një shtetas kosovar, i cili kërkohej për veprën penale të grabitjes. Pas kthimit në vend, ai iu dorëzua njësive policore në rajonin e Gjilanit.
Të dy personat ishin arrestuar më parë nga autoritetet e vendeve ku ndodheshin, në bazë të kërkesave ndërkombëtare të lëshuara nga institucionet e drejtësisë së Kosovës.
Policia ka bërë të ditur se ekstradimet u realizuan në përputhje me legjislacionin në fuqi, falë bashkëpunimit ndërmjet institucioneve kosovare dhe autoriteteve gjermane e zvicerane.
Operacionet u koordinuan nga Drejtoria për Bashkëpunim Ndërkombëtar Policor, në bashkëpunim me njësitë relevante të Policisë së Kosovës dhe institucionet e drejtësisë. /Albinfo.ch
