Një seminar kushtuar gjuhës shqipe dhe identitetit kombëtar shqiptar do të mbahet më 18 tetor 2026 në Parma të Italisë, me temën “Jepi zë shqipes dhe identitetit”, transmeton albinfo.ch.
Aktiviteti synon të vërë në pah rëndësinë e ruajtjes dhe përcjelljes së gjuhës, kulturës dhe traditave shqiptare te brezat e rinj, veçanërisht në mesin e komunitetit shqiptar që jeton jashtë atdheut.
Seminari organizohet nga Lidhja e Shkollave të Gjuhës Shqipe në Itali, në bashkëpunim me shoqatën Scanderbeg Parma dhe me mbështetjen e Komunës së Parmës.
Në këtë takim pritet të bashkohen mësues të gjuhës shqipe, prindër, përfaqësues të shoqatave dhe persona të tjerë të angazhuar në ruajtjen e identitetit shqiptar në mërgatë.
Përmes këtij aktiviteti synohet të theksohet roli i shkollave shqipe në diasporë, të cilat kontribuojnë në mësimin e gjuhës amtare dhe në përcjelljen e vlerave kulturore e kombëtare te fëmijët dhe të rinjtë shqiptarë.
Seminari do të mbahet më 18 tetor 2026, në Palazzo del Governatore, në Piazza Garibaldi, në Parma të Italisë./Albinfo.ch
