Danimarka pritet të krijojë një mundësi të re punësimi për shtetasit e huaj, përfshirë ata nga Shqipëria, përmes një skeme që synon t’ua lehtësojë kompanive të caktuara rekrutimin e punonjësve nga jashtë vendit, përcjell albinfo.ch.
Skema e re parashihet të nisë më 1 janar 2027 dhe do të jetë e qasshme vetëm për punëdhënësit që përmbushin kushtet e përcaktuara nga autoritetet daneze të emigracionit.
Për t’u kualifikuar, kompanitë duhet të mbulohen nga një marrëveshje kolektive përkatëse, të ushtrojnë aktivitet në Danimarkë për të paktën dy vjet dhe të kenë së paku 10 punonjës me orar të plotë në vend.
Gjithashtu, punëdhënësit duhet të regjistrohen pranë autoritetit danez të emigracionit dhe të pajisen me certifikatë që vërteton se i plotësojnë kriteret për përdorimin e kësaj skeme.
Shqipëria në mesin e 16 vendeve
Përveç Shqipërisë, lista e vendeve të përfshira në skemë përfshin Indinë, Australinë, Brazilin, Kanadanë, Kinën, Japoninë, Malajzinë, Moldavinë, Malin e Zi, Maqedoninë e Veriut, Serbinë, Singaporin, Ukrainën, Mbretërinë e Bashkuar dhe Shtetet e Bashkuara të Amerikës.
Kjo skemë mund t’u krijojë shtetasve të këtyre vendeve një mundësi shtesë për të gjetur punë në Danimarkë, por punësimi do të varet nga ofertat konkrete të kompanive dhe plotësimi i kushteve ligjore.
Paga minimale vjetore, 322 mijë korona
Sipas kushteve të parashikuara, paga minimale vjetore për punonjësit e punësuar përmes kësaj skeme do të jetë 322 mijë korona daneze.
Ky prag është më i ulët se disa prej pragjeve të pagës që zbatohen në skemat e tjera të zakonshme të punësimit për shtetasit e huaj në Danimarkë.
Megjithatë, lehtësimi nuk nënkupton se të gjithë shtetasit e vendeve të përfshira do të kenë automatikisht të drejtë të punojnë në Danimarkë. Mundësia do të vlejë përmes punëdhënësve të certifikuar dhe në përputhje me kriteret e skemës.
Skema e re pritet të hyjë në fuqi më 1 janar 2027./Albinfo.ch
