Për shkak të valës së të nxehtit gjatë verës, Hekurudhat Federale Zvicerane (SBB) kanë regjistruar pothuajse 100 raste të shtrembërimit të shinave dhe deformimeve të shkaktuara nga presioni. Si përgjigje ndaj të nxehtit të jashtëzakonshëm të verës së vitit 2026, kompania krijoi një grup pune.
E pyetur për këtë, SBB konfirmoi shifrën prej 97 rastesh të shtrembërimit dhe deformimit nga presioni, të raportuar nga gazeta “SonntagsZeitung”. Sipas gazetës, kjo shifër është pothuajse katër herë më e lartë se ajo e vitit të mëparshëm.
Kompania hekurudhore theksoi se rritja e numrit të deformimeve apo uljeve të terrenit nuk ka ndikuar në siguri. Megjithatë, Patrick Braess, një ekspert nga Instituti Federal Zviceran i Teknologjisë (ETH) në Cyrih, paralajmëroi në gazetë për rrezikun e daljes së trenave nga shinat si pasojë e nxehtësisë.
SBB i inspekton rregullisht shinat e saj duke përdorur mjete matëse dhe diagnostikuese. Duke pasur parasysh nxehtësinë e jashtëzakonshme të verës së kaluar, SBB krijoi një grup pune me detyrën për të identifikuar masa shtesë, aty ku është e nevojshme. Por, rreziku zero nuk ekziston, shkruan swissinfo, transmeton albinfo.ch.
SBB përqendrohet, mbi të gjitha, në masa afatgjata, të synuara dhe efektive. Këtu përfshihet, veçanërisht, përdorimi i traversave prej betoni, të cilat ofrojnë stabilitet më të madh sesa ato prej druri si dhe rritja e temperaturës së neutralizimit gjatë saldimit, në mënyrë që shinat t’u rezistojnë më mirë temperaturave përgjithësisht më të larta.
Bojë e bardhë a është kjo një zgjidhje?
SBB ka testuar përdorimin e bojës së bardhë si masë kundër nxehtësisë. Në fillim, efekti ftohës ishte mesatarisht rreth 4,5 gradë. Pas dy vitesh, ky efekt u përgjysmua për shkak të ndotjes, njoftoi SBB. Sa më i dendur të jetë trafiku, aq më shpejt zbehet ky efekt.
Megjithatë, në kuadër të një analize të vazhdueshme, SBB po shqyrton nëse veshjet me ngjyrë të bardhë mund të jenë një masë e përshtatshme për raste të caktuara specifike.
