Dy studentë të Fakultetit të Mjekësisë në Universitetin e Prishtinës, Olt Haziri dhe Olisë Krasniqi, kanë bërë të ditur se kanë zhvilluar praktikë klinike në fushën e kardiologjisë në Spitalin Kantonal të Lucernit (Kantonsspital Luzern), në Zvicër, nën udhëheqjen e profesorit Florim Cuculi.
Në këtë përvojë morën pjesë edhe dy mjeke shqiptare nga Maqedonia e Veriut.
Për studentët nga Kosova, praktika ishte një mundësi për të parë nga afër punën klinike, për të zgjeruar njohuritë në kardiologji dhe për t’u njohur me një mjedis të ri profesional.
Ata në një prononcim për albinfo.ch kanë vlerësuar rëndësinë e kësaj përvoje për formimin e tyre si mjekë të ardhshëm, duke theksuar rolin e mentorimit dhe të shkëmbimit të njohurive.
Përvoja të tilla nxjerrin në pah edhe kontributin që profesionistët shqiptarë në Zvicër mund të japin në mbështetjen e studentëve të mjekësisë, duke u hapur mundësi për zhvillim profesional dhe bashkëpunim ndërkombëtar.
