Bashkëthemeluesi i kompanisë së investimeve Partners Group, Alfred Gantner, ka propozuar vendosjen e një takse për kompanitë në Zvicër që punësojnë punëtorë nga vendet e Bashkimit Evropian.
Sipas tij, kompanitë janë ndër përfituesit kryesorë të emigracionit, prandaj duhet të marrin përsipër një pjesë të kostove që lidhen me rritjen e popullsisë dhe përdorimin e infrastrukturës publike.
Propozimi parasheh që taksa të llogaritet në bazë të pagës së punonjësit dhe të paguhet nga punëdhënësi gjatë një periudhe pesëvjeçare, shkruan The Local, transmeton albinfo.ch.
Për shembull, për një punonjës me pagë vjetore prej 75 mijë frangash, kompania do të paguante gjithsej 15 mijë franga gjatë pesë vjetëve, ndërsa për një punonjës me pagë vjetore prej 300 mijë frangash, detyrimi mund të arrinte në 225 mijë franga gjatë së njëjtës periudhë.
Gantner vlerëson se një masë e tillë mund të gjenerojë rreth 1.35 miliardë franga në vit. Një pjesë e këtyre mjeteve do të shkonte në buxhetin shtetëror, ndërsa pjesa tjetër do të mund të shpërndahej te qytetarët, veçanërisht familjet me të ardhura të ulëta.
Sipas përllogaritjeve të tij, një familje katëranëtarëshe me të ardhura të ulëta mund të përfitonte deri në 4 mijë franga në vit, nëse fondet do të orientoheshin drejt kësaj kategorie.
Ky propozim vjen në kohën kur në Zvicër po diskutohet edhe një nismë tjetër për vendosjen e një takse prej 4 mijë frangash për shtetasit e BE-së që vendosen në vend.
Dallimi kryesor është se propozimi i diskutuar në Parlament e vendos barrën financiare te personat që imigrojnë, ndërsa Gantner kërkon që pagesën ta kryejnë kompanitë që i punësojnë.
Megjithatë, propozimi i biznesmenit përballet me pengesa ligjore, pasi mund të jetë në kundërshtim me marrëveshjen për lëvizjen e lirë të personave ndërmjet Zvicrës dhe Bashkimit Evropian.
Aktualisht, kjo taksë nuk është miratuar dhe mbetet vetëm një propozim. Për zbatimin e saj do të nevojiteshin vendime të mëtejshme politike dhe ligjore.
