Një defekt teknik në sistemin informativ të Grupit Spitalor Insel në Bernë ndërpreu përkohësisht punën të mërkurën në mbrëmje. Sistemi u rikthye në funksion të enjten në mëngjes, ndërsa siguria e pacientëve nuk u rrezikua në asnjë moment.
Një defekt teknik ndërpreu përkohësisht funksionimin e sistemit informativ të Grupit Spitalor Insel në Bernë, të mërkurën në mbrëmje, rreth orës 20:00.
Zëdhënësi për media i grupit spitalor, Olivier Dischoe, tha për transmetuesin publik zviceran SRF se sistemi informativ spitalor përbën një pikë të rëndësishme lidhëse për shkëmbimin e të dhënave dhe informacioneve ndërmjet pacientëve, mjekëve referues dhe mjekëve të familjes.
Puna vazhdoi me letër dhe laps
Për shkak të ndërprerjes, personeli mjekësor u detyrua t’u rikthehej përkohësisht procedurave manuale, duke dokumentuar punën me letër dhe laps.
Sipas Dischoe, kjo kërkoi angazhim shtesë gjatë orëve të natës, por stafi arriti ta përballonte situatën, pasi ishte i trajnuar për raste të tilla.
Shërbimet emergjente mbetën të hapura gjatë gjithë kohës, ndërsa personeli vazhdoi punën sipas planeve të parapara për situata emergjente, pa u mbështetur në sistemin informativ.
Grupi Spitalor Insel përfshin, përveç Spitalit Universitar të Bernës, edhe institucione të tjera shëndetësore, ndër to spitalet në Riggisberg dhe Aarberg.
Sistemi u rikthye, por pati probleme të herëpashershme
Ndërprerja u shkaktua nga një problem teknik me pajisjet harduerike. Defekti u zgjidh në orët e para të së enjtes, kur sistemi rifilloi funksionimin në të gjitha lokacionet e grupit spitalor.
Megjithatë, gjatë ditës u evidentuan ende disa probleme të herëpashershme, veçanërisht gjatë ngarkimit të dokumenteve dhe fotografive.
Dischoe bëri të ditur se shkëmbimi i informacionit ndërmjet departamenteve të ndryshme ishte i kufizuar për një periudhë të caktuar, por më pas situata u kthye në normalitet.
Shkaku i saktë i defektit është duke u hetuar në bashkëpunim me kompaninë furnizuese.
Pavarësisht ndërprerjes së sistemit informativ, kujdesi mjekësor dhe siguria e pacientëve u garantuan gjatë gjithë kohës.
