Një cenueshmëri kritike në gjuhën programuese PHP ka detyruar kompaninë zvicerane Cyon të ndërpresë përkohësisht funksionimin e mbi 100 mijë faqeve të internetit, për të parandaluar sulmet e mundshme kibernetike.
Si pasojë, disa faqe dhe shërbime online, përfshirë ato të Universitetit të Gjenevës dhe kantonit të Bazelit, u bënë përkohësisht të paarritshme. Ndërprerja synonte mbrojtjen e të dhënave dhe sistemeve nga ndërhyrjet e paautorizuara.
Sipas autoriteteve zvicerane, deri më tani nuk janë identifikuar sulme që lidhen drejtpërdrejt me këtë cenueshmëri. Megjithatë, ekziston rreziku i rrjedhjes së të dhënave të përdoruesve, komprometimit të faqeve të internetit dhe dëmtimit të sistemeve informatike.
Cyon bëri të ditur se shërbimet e saj ishin rikthyer në funksion që nga mëngjesi i së enjtes, ndërsa autoritetet u kanë bërë thirrje operatorëve të faqeve të internetit të instalojnë sa më shpejt përditësimet e sigurisë.
