Gjashtë vende evropiane kanë kursyer së bashku pothuajse 2 miliardë euro falë përdorimit të veturave elektrike, të cilat kanë ulur konsumin e naftës dhe varësinë nga importet, në kushtet e krizës energjetike të shkaktuar nga lufta me Iranin.
Sipas një analize të organizatës kërkimore për energjinë Ember, Danimarka, Franca, Gjermania, Holanda, Suedia dhe Mbretëria e Bashkuar kanë përfituar nga rritja e numrit të veturave elektrike, duke shmangur importin e sasive të konsiderueshme të naftës.
Në nivel global, përdorimi i veturave elektrike ka zëvendësuar rreth 200 milionë fuçi naftë bruto, me vlerë afërsisht 17,82 miliardë euro, gjatë periudhës mars-gusht 2026.
Danimarka kryeson në Evropë për nga ndikimi në raport me konsumin kombëtar, pasi flota e saj elektrike ka shmangur përdorimin e naftës në një sasi të barabartë me 13 për qind të konsumit vjetor të vendit në vitin 2025.
Ndërkohë, rritja e çmimit të naftës Brent, e cila më 22 tetor iu afrua 100 dollarëve për fuçi, ka shtuar shqetësimet për sigurinë energjetike dhe ndikimin ekonomik të tensioneve në Lindjen e Mesme.
Sipas ekspertëve të Ember, investimet në vetura elektrike jo vetëm që ndihmojnë në uljen e emetimeve ndotëse, por edhe zvogëlojnë ekspozimin e vendeve ndaj luhatjeve të çmimeve të naftës dhe ndërprerjeve të mundshme të furnizimit.
Megjithatë, përfitimet mjedisore varen edhe nga mënyra e prodhimit të baterive dhe burimi i energjisë elektrike që përdoret për karikimin e veturave.
