Marrja e shtetësisë gjermane është e mundur pas pesë vitesh qëndrimi të ligjshëm në vend, por vetëm nëse plotësohen një sërë kriteresh që lidhen me punësimin, të ardhurat, njohjen e gjuhës dhe respektimin e ligjeve.
Autoritetet gjermane kanë publikuar në portalin zyrtar të emigracionit kushtet e natyralizimit dhe kostot që duhet të përballojnë aplikantët. Rregullat vlejnë edhe për mijëra emigrantë shqiptarë që jetojnë dhe punojnë në Gjermani.
Kushti i parë është qëndrimi i ligjshëm për të paktën pesë vite, i shoqëruar me një status qëndrimi të përshtatshëm për natyralizim.
Aplikantët duhet gjithashtu të provojnë se janë në gjendje të përballojnë shpenzimet e jetesës për veten dhe familjarët në ngarkim, pa u mbështetur në ndihmat sociale të përcaktuara në legjislacion, përveç rasteve kur zbatohen përjashtime ligjore.
Një tjetër kriter është njohja e gjuhës gjermane, të paktën në nivelin B1, si dhe njohja e sistemit ligjor, rendit kushtetues dhe jetës shoqërore. Këto njohuri zakonisht vërtetohen përmes provimeve përkatëse. Po ashtu, aplikantët duhet të plotësojnë kriteret që lidhen me të kaluarën penale dhe respektimin e rendit demokratik gjerman.
Tarifa standarde e aplikimit është 255 euro për person, ndërsa për fëmijët e mitur pa të ardhura që përfshihen në aplikimin e prindërve, ajo është 51 euro, shkruan Scan, transmeton albinfo.ch.
Një nga elementet më të rëndësishme për emigrantët shqiptarë është mundësia e mbajtjes së dy shtetësive. Legjislacioni gjerman u lejon personave që natyralizohen të ruajnë shtetësinë e mëparshme, çka do të thotë se shqiptarët mund të pajisen me pasaportë gjermane pa hequr dorë nga ajo shqiptare.
Ndërkohë, Gjermania ka hequr mundësinë e përshpejtuar të marrjes së shtetësisë pas vetëm tre vitesh qëndrimi. Ndryshimi hyri në fuqi më 30 tetor 2025, duke rikthyer afatin minimal të përgjithshëm prej pesë vitesh.
Plotësimi i periudhës së qëndrimit nuk garanton automatikisht marrjen e shtetësisë. Çdo aplikim shqyrtohet individualisht nga autoritetet kompetente, në varësi të dokumentacionit dhe përmbushjes së kritereve ligjore.
