Kompanitë zvicerane pritet t’i shpërblejnë me paga të larta profesionistët me njohuri në inteligjencën artificiale gjatë vitit 2027. Kështu tregon udhëzuesi i ri i pagave nga kompania e rekrutimit Robert Half, raporton World Radio Switzerland.
Sipas raportit, një menaxher inxhinierie me njohuri në inteligjencën artificiale mund të presë pagë vjetore rreth 170 mijë franga, ndërsa një arkitekt të dhënash në këtë fushë rreth 144 mijë franga. Drejtorët financiarë kryesojnë listën e pagave të përmendura, me rreth 277.500 franga në vit, transmeton albinfo.ch.
Dallime ka edhe ndërmjet qyteteve. Profesionistët në Cyrih paguhen afërsisht 10 për qind mbi mesataren kombëtare, ndërsa në Gjenevë rreth 6 për qind më shumë.
Pothuajse gjysma e punëdhënësve deklarojnë se janë të gatshëm të tejkalojnë kufijtë e planifikuar të pagave për të siguruar profesionistët më të aftë. Në teknologjinë e informacionit, kjo përqindje arrin në 53 për qind.
Raporti tregon gjithashtu se gjatë vitit 2025 pagat e grave u rritën mesatarisht me 2,3 për qind, me ritëm më të shpejtë se ato të burrave në të gjithë sektorët.
