Autoritetet e Lozanës në Zvicër kanë miratuar masat e para për reformimin e policisë bashkiake, pas disa krizave të viteve të fundit, përfshirë zbulimin e mesazheve raciste dhe seksiste mes policëve. Reforma parasheh trajnime kundër diskriminimit, ndryshime në udhëheqje dhe rritjen e diversitetit në radhët e policisë.
Reforma, e emërtuar «2030», synon të përmirësojë organizimin e policisë, koordinimin operacional dhe besimin e qytetarëve në institucion.
Sipas Komunës së Lozanës, janë nisur 13 projekte konkrete, të bazuara në raportin përfundimtar të André Duvillardit, ish-komandant i Policisë së Neuchâtelit.
Një nga masat kryesore është trajnimi i detyrueshëm për drejtuesit e policisë, i cili do të përqendrohet në parandalimin e diskriminimit dhe zhvillimin e kompetencave ndërkulturore. Pas fazës pilot, programi pritet të shtrihet te të gjithë drejtuesit gjatë viteve 2027 dhe 2028
Reforma përfshin gjithashtu riorganizimin e burimeve njerëzore, forcimin e strukturës drejtuese dhe krijimin e hapësirave të reja të komunikimit mes menaxhmentit dhe punonjësve. Autoritetet synojnë edhe rritjen e numrit të grave dhe diversitetit në radhët e policisë.
Vitet e fundit, policia e Lozanës është përballur me disa kriza serioze, përfshirë zbulimin e komunikimeve raciste dhe seksiste në grupe private në WhatsApp, si dhe raste vdekjesh të lidhura me ndjekje dhe ndërhyrje policore.
Përgjegjësi komunal për sigurinë, Pierre-Antoine Hildbrand, e ka mbrojtur procesin e reformës, duke theksuar se tashmë ka nisur zbatimi i masave konkrete.
Megjithatë, përfaqësues të së majtës i kanë kritikuar masat, duke i cilësuar si të pamjaftueshme për të sjellë ndryshime të thella strukturore.
