Rreth 200 kompani me kapital gjerman operojnë në Kosovë, ndërsa marrëdhëniet ekonomike ndërmjet dy vendeve po shënojnë rritje. Gjatë vitit 2025, tregtia bilaterale arriti në rreth 600 milionë euro, me një rritje prej afërsisht 15 për qind krahasuar me vitin paraprak, transmeton albinfo.ch.
Këto të dhëna u theksuan në edicionin e tretë të Forumit Ekonomik Gjermano-Kosovar, i cili mblodhi përfaqësues të institucioneve dhe bizneseve nga të dyja vendet për të diskutuar zgjerimin e tregtisë, tërheqjen e investimeve dhe mundësitë e reja të bashkëpunimit.
Në forum morën pjesë drejtori ekzekutiv i Odës Ekonomike Gjermano-Kosovare, Besnik Vasolli, ambasadori i Gjermanisë në Kosovë, Rainer Rudolph, kryeministri Albin Kurti dhe zëvendësdrejtoresha e Përgjithshme për Politikat Ekonomike të BE-së, Tregun e Brendshëm dhe Marrëdhëniet Bilaterale në Ministrinë Federale të Ekonomisë dhe Energjisë të Gjermanisë, Dr. Nina Wunderlich.
Gjatë diskutimeve u vu në pah rëndësia e lidhjeve ekonomike ndërmjet dy vendeve, kontributi i diasporës kosovare në Gjermani dhe potenciali për investime në energji, prodhim, shërbime digjitale dhe teknologji inovative.
Vasolli: Duam që Kosova të ketë një vend më të fortë në ekonominë gjermane
Drejtori ekzekutiv i Odës Ekonomike Gjermano-Kosovare, Besnik Vasolli, theksoi interesimin për pjesëmarrje në forum dhe rëndësinë e forcimit të bashkëpunimit ndërmjet bizneseve.
“Sot ne duam që Kosova të ketë një vend më të fortë në ekonominë gjermane. Ky forum tregon se sa i madh është interesi për të punuar së bashku”, u shpreh Vasolli.
Ai bëri të ditur se diskutimet janë përqendruar në sektorë me potencial për zhvillim të mëtejshëm ekonomik, përfshirë inteligjencën artificiale, energjinë, prodhimin e avancuar dhe industrinë.
Gjermania, partner i rëndësishëm për investimet në Kosovë
Ambasadori gjerman në Kosovë, Rainer Rudolph, vlerësoi se marrëdhëniet ekonomike ndërmjet dy vendeve janë të fuqishme, por se ekziston ende hapësirë për rritjen e tregtisë dhe zgjerimin e investimeve.
Ai veçoi diasporën kosovare në Gjermani si një faktor të rëndësishëm në forcimin e lidhjeve ndërmjet dy vendeve.
“Gjermania është shtëpi për diasporën më të madhe kosovare jashtë vendit, e cila krijon një rrjet të afërt në nivel personal ndërmjet dy vendeve tona”, deklaroi Rudolph.
Sipas tij, kompanitë gjermane kontribuojnë në ekonominë e Kosovës përmes krijimit të vendeve të punës, bartjes së ekspertizës dhe sjelljes së teknologjive të reja.
Rudolph përmendi gjithashtu mundësitë për bashkëpunim në tranzicionin energjetik, duke vlerësuar se Kosova ka potencial për zhvillimin e projekteve dhe investimeve të reja në këtë sektor.
Ai theksoi se, pavarësisht sfidave globale, përfshirë inflacionin dhe pasiguritë në tregjet energjetike, të dyja vendet duhet të shfrytëzojnë mundësitë ekzistuese për ta thelluar partneritetin ekonomik./Albinfo.ch
