Në Prishtinë është hapur edicioni i tretë i Forumit Ekonomik Gjermano-Kosovar, ku kryeministri i Kosovës, Albin Kurti, ka theksuar rëndësinë e thellimit të bashkëpunimit ekonomik ndërmjet dy vendeve, tërheqjes së investimeve të reja dhe zgjerimit të partneritetit në teknologji e inovacion, përcjell albinfo.ch.
Forumi dyditor organizohet nga KDWV, me mbështetjen e Ambasadës Gjermane dhe Qeverisë së Kosovës, ndërsa synon që mundësitë e diskutuara në takimin e mbajtur në maj në Schloss Bensberg të Gjermanisë të shndërrohen në bashkëpunim ekonomik afatgjatë.
Gjatë fjalës së tij, Kurti tha se marrëdhëniet ndërmjet Kosovës dhe Gjermanisë janë ndërtuar jo vetëm mbi shkëmbimet tregtare dhe investimet, por edhe mbi lidhjet e krijuara ndërmjet qytetarëve të të dyja vendeve.
Ai vuri në pah rolin e mërgatës kosovare në Gjermani, duke e cilësuar atë si një urë të rëndësishme mes dy shoqërive dhe një faktor me ndikim në zhvillimin ekonomik të Kosovës.
Sipas Kurtit, gjatë vitit të kaluar mërgata kosovare dërgoi mbi 1.4 miliardë euro në vendlindje, ndërsa që nga viti 2008, afër dy në pesë euro të remitencave kanë ardhur nga Gjermania.
Rreth 200 kompani gjermane operojnë në Kosovë
Kryeministri theksoi se rreth 200 kompani me kapital gjerman tashmë janë aktive në Kosovë, duke e cilësuar këtë si dëshmi të besimit të investitorëve gjermanë në ekonominë vendore.
Ai bëri të ditur se eksportet e Kosovës drejt Gjermanisë janë rritur nëntëfish gjatë dekadës së fundit, nga më pak se 12 milionë euro në vitin 2015 në mbi 107 milionë euro në vitin 2025.
Sipas tij, synimi i radhës është zgjerimi i investimeve, forcimi i zinxhirëve të furnizimit dhe zhvillimi i bashkëpunimit në sektorët me potencial të lartë.
Kurti veçoi edhe përparësitë që, sipas tij, ofron Kosova për investitorët, përfshirë popullsinë e re, qasjen e gjerë në internet, përdorimin e euros dhe një sistem tatimor me normë prej 10 për qind për të ardhurat e korporatave.
Ai përmendi gjithashtu marrëveshjen e tregtisë së lirë me shtetet e EFTA-s, e cila, sipas tij, ka hyrë në fuqi në të katër shtetet anëtare më 1 tetor, si dhe ratifikimin e tri protokolleve të reja të CEFTA-s.
Digjitalizimi, energjia dhe industria në fokus
Tri fushat kryesore të edicionit të sivjetmë të forumit janë transformimi digjital dhe inteligjenca artificiale, energjia dhe infrastruktura e qëndrueshme, si dhe avancimi i prodhimit dhe industrisë.
Kurti vlerësoi se këta sektorë krijojnë mundësi për ndërthurjen e kapitalit dhe përvojës gjermane me potencialin profesional dhe talentin e Kosovës.
Përveç paneleve me diskutime profesionale, programi i forumit përfshin takime ndërmjet bizneseve dhe vizita në kompani, me synimin për të nxitur kontakte të reja dhe për të identifikuar mundësi konkrete bashkëpunimi ekonomik./Albinfo.ch
