Agjencia e Ushqimit dhe Veterinarisë (AUV) ka refuzuar importin e mbi 25 tonëve misër dhe ka ndaluar shitjen e një produkti ushqimor për viça, pasi gjatë kontrolleve janë konstatuar nivele të aflatoksinave mbi kufijtë e lejuar, përcjell albinfo.ch.
Sipas njoftimit të AUV-së, gjatë kontrolleve kufitare dhe inspektimeve në tregun e brendshëm janë identifikuar produkte të kompanisë MONUNI SH.P.K. nga Gjilani, të cilat nuk kanë përmbushur standardet e sigurisë ushqimore.
Në një ngarkesë prej 25,120 kilogramësh misër merkantil, analizat laboratorike të AUV-së kanë konstatuar praninë e aflatoksinës B1 në nivelin 30 µg/kg. Ndërkohë, analizat e Institutit Kombëtar të Shëndetësisë Publike të Kosovës (IKSHPK) kanë konfirmuar aflatoksina totale prej 47 µg/kg, duke tejkaluar vlerën referente prej 10 µg/kg.
Pas këtyre rezultateve, Inspektorati Fitosanitar i AUV-së ka marrë vendim për refuzimin e importit dhe kthimin e ngarkesës në vendin e origjinës.
Kontrollet kanë vazhduar edhe në kompaninë MONUNI, ku analizat laboratorike kanë zbuluar aflatoksinë B1 mbi nivelin e lejuar edhe në produktin “Ushqim për viça deri 300 kg”.
Si rezultat, inspektorët kanë ndaluar shitjen dhe kanë urdhëruar tërheqjen e produktit të identifikuar nga qarkullimi.
AUV ka sqaruar se aflatoksina B1 është një substancë toksike që prodhohet nga disa lloje myqesh dhe mund të shkaktojë dëmtime të mëlçisë, si dhe të rrisë rrezikun e kancerit gjatë ekspozimit afatgjatë.
Te kafshët qumështore, kjo substancë mund të kalojë në qumësht në formën e aflatoksinës M1, duke paraqitur rrezik edhe për sigurinë ushqimore.
Agjencia ka bërë të ditur se do të vazhdojë kontrollet zyrtare dhe analizat laboratorike për të parandaluar qarkullimin e produkteve që nuk përmbushin standardet e sigurisë, me qëllim mbrojtjen e shëndetit të njerëzve dhe kafshëve.
