Në kantonin Ticino të Zvicrës është përuruar ura e re Visletto, e cila zëvendëson urën e shkatërruar nga përmbytjet e fuqishme të qershorit 2024, përcjell albinfo.ch.
Përurimi është bërë të shtunën, më 31 tetor, ndërsa ura është hapur për qarkullimin e automjeteve në orën 16:30.
Sipas autoriteteve kantonale, ndërtimi i urës së re përbën një hap të rëndësishëm drejt rikthimit të përhershëm të lidhjes rrugore me pjesën e sipërme të luginës Maggia.
Ura është ndërtuar pak më lart përgjatë rrjedhës së lumit, në krahasim me vendndodhjen e mëparshme, me qëllim rritjen e sigurisë ndaj erozionit dhe përmbytjeve të mundshme.
Konstrukti i ri është mbi 150 metra i gjatë dhe përbëhet nga një strukturë prej betoni të armuar. Përveç qarkullimit rrugor, ura përfshin edhe infrastrukturën e nevojshme për furnizimin me ujë, kanalizimin, energjinë elektrike dhe telekomunikacionin.
Kostoja e ndërtimit ka arritur në 10.5 milionë franga zvicerane, shumë kjo e mbuluar plotësisht nga kantoni Ticino.
Autoritetet kanë theksuar se përfundimi i urës përbën një etapë të rëndësishme të rindërtimit, por punimet për rikuperimin e plotë të zonës do të vazhdojnë.
Në kuadër të masave të planifikuara përfshihen përmirësimi i mbrojtjes nga përmbytjet, ndërtimi i infrastrukturës për këmbësorët dhe çiklistët, si dhe rregullimi i mëtejshëm i zonës së Vislettos.
Ura e mëparshme ishte shkatërruar gjatë natës ndërmjet 29 dhe 30 qershorit 2024, kur reshjet e dendura shkaktuan vërshimin e lumit Maggia.
Përmbytjet e asaj kohe shkaktuan vdekjen e shtatë personave, ndërsa një person vazhdon të rezultojë i zhdukur.
Shkatërrimi i urës kishte ndërprerë përkohësisht lidhjet rrugore me disa lugina anësore, duke vështirësuar qarkullimin dhe jetën e banorëve të zonës.
Përurimi i urës së re shënon një hap të rëndësishëm në rikthimin e normalitetit për komunitetet e prekura nga fatkeqësia natyrore.
