Qarkullimi hekurudhor në linjën Lozanë–Gjenevë është ndërprerë rëndë të martën në mbrëmje, njoftuan Hekurudhat Federale Zvicerane (SBB).
Sipas njoftimit të publikuar nga SBB, qarkullimi i trenave është pezulluar në segmentin ndërmjet Glandit dhe Coppet, pasi një person është goditur nga treni.
Ndërprerja pritet të zgjasë të paktën deri në orën 22:00, ndërsa udhëtarët duhet të llogarisin vonesa dhe anulime të shumta.
Problemi ka prekur linjat EC, IC1, IR15, IR57, IR90, IR95 dhe RE33.
Për të siguruar transportin e udhëtarëve, janë vënë në dispozicion autobusë zëvendësues në relacionin Coppet–Nyon. Megjithatë, autoritetet paralajmërojnë se mund të ketë pritje dhe vonesa.
Sipas njoftimit të SBB-së, në stacionin e Nyonit udhëtarët nuk kishin mundësi të vazhdonin udhëtimin drejt Lozanës apo Gjenevës.
Hekurudhat Federale Zvicerane po përditësojnë vazhdimisht informacionet lidhur me situatën në faqen e tyre zyrtare.
