Studentët e Universitetit të Prishtinës kanë shënuar një sukses të rëndësishëm në garën ndërkombëtare të debatit “Botta e Risposta”, që po mbahet në Padova të Italisë, duke siguruar një vend në finalen e madhe, transmeton albinfo.ch.
Ekipi i Kosovës, i përbërë nga Dardan Bytyqi, Eraa Morina, Jona Olloni dhe Flandra Hasani, ka fituar gjysmëfinalen e parë përballë ekipit përfaqësues të Italisë.
Rrugëtimi i studentëve kosovarë drejt finales është shoqëruar edhe me fitore ndaj ekipeve përfaqësuese të Sllovenisë, Francës dhe Indisë/Indonezisë.
Përveç suksesit ekipor, Dardan Bytyqi është vlerësuar si oratori më i mirë i debatit, ndërsa të katër studentët kanë shkëlqyer edhe në kategorinë e kundërargumentimit (rebuttal).
Ky rezultat e ka vendosur Kosovën dhe Universitetin e Prishtinës në mesin e ekipeve finaliste të garës, ndërsa sfida e radhës do të jetë finalja e madhe, e cila zhvillohet të premten./Albinfo.ch
