Sara Çunaku ka përfunduar me sukses studimet Master Shkencor në WU Vienna – Universitetin e Ekonomisë dhe Biznesit në Vjenë, duke shënuar një etapë të rëndësishme në formimin e saj akademik, shkruan albinfo.ch.
Rrugëtimi i saj drejt kësaj arritjeje është karakterizuar edhe më herët nga rezultate të shkëlqyera. Sara ka përfunduar studimet bachelor në të njëjtin universitet, me notën maksimale, duke dëshmuar përkushtimin dhe rezultatet e larta akademike që e kanë shoqëruar gjatë formimit të saj universitar.
Përfundimi i studimeve master përfaqëson rezultat të punës së vazhdueshme, këmbënguljes dhe pasionit për dijen. Në të njëjtën kohë, kjo diplomë hap mundësi të reja për zhvillimin e saj të mëtejshëm akademik dhe profesional.
Por rrugëtimi i Sarës nuk përfundon me këtë diplomë. Sipas njoftimit të familjes, ajo pritet të nisë një kapitull të ri në WU Vienna, këtë herë në kuadër të studimeve të Doktoratës, duke synuar thellimin e mëtejshëm të njohurive dhe angazhimin në fushën akademike.
Lajmin për këtë sukses e ka ndarë me krenari babai i saj, Lami Çunaku, një sipërmarrës dhe menaxher i njohur në fushën e kulturës dhe turizmit në Vjenë, me një karriere të gjatë në industrinë e muzikës klasike vjeneze. Ai ka shprehur gëzimin e familjes për këtë arritje dhe ka theksuar krenarinë për të bijën dhe i ka uruar asaj suksese të mëtejshme në rrugën e dijes.
Me përfundimin e studimeve bachelor me notën maksimale dhe diplomimin në nivelin Master Shkencor, Sara Çunaku shënon dy etapa të rëndësishme në formimin e saj akademik, ndërsa synimi për doktoratë paralajmëron vazhdimin e këtij rrugëtimi./Albinfo.ch
