Mali i Zi mund të bëhet vendi i radhës që do t’i bashkohet Bashkimit Evropian, me synimin për ta realizuar anëtarësimin në vitin 2028. Në të njëjtën kohë, Shqipëria synon përfundimin e negociatave deri në fund të vitit 2027, ndërsa Kosova vazhdon të mos ketë një afat të përcaktuar për avancimin e procesit të integrimit, përcjell albinfo.ch.
Sipas mediumit zviceran Watson, i cili i referohet vlerësimit të ri të Komisionit Evropian, Mali i Zi mund t’i përfundojë negociatat e anëtarësimit deri në fund të vitit 2026. Nëse përmbushen kushtet e nevojshme, marrëveshja e anëtarësimit mund të nënshkruhet në qershor të vitit 2027, ndërsa anëtarësimi në BE synohet për vitin 2028.
Ky vend konsiderohet aktualisht më i avancuari ndër shtetet kandidate, pasi ka mbyllur përkohësisht 21 nga gjithsej 33 kapitujt e negociatave.
Shqipëria synon vitin 2027
Shqipëria, ndërkaq, synon t’i përfundojë negociatat e anëtarësimit deri në fund të vitit 2027. Sipas vlerësimit të Komisionit Evropian, ky objektiv mund të arrihet, por kërkon vazhdimin e reformave, veçanërisht në sundimin e ligjit, luftën kundër korrupsionit dhe forcimin e institucioneve demokratike.
Tirana ka hapur tashmë edhe grupkapitullin e fundit të negociatave, duke hyrë në një fazë të rëndësishme të procesit të anëtarësimit.
Kosova ende pa një udhërrëfyes konkret
Ndryshe nga Mali i Zi dhe Shqipëria, Kosova vazhdon të mos ketë një afat konkret për hapat e ardhshëm drejt anëtarësimit në Bashkimin Evropian. Sipas raportit të Komisionit Evropian, ende nuk është përcaktuar një udhërrëfyes për fazat e mëtejshme të procesit.
Brukseli vlerëson se kriza e zgjatur institucionale ka ndikuar në ngadalësimin e reformave të lidhura me integrimin evropian. Megjithatë, në raport evidentohen edhe disa përparime, përfshirë luftën kundër krimit të organizuar dhe përafrimin e Kosovës me politikën e jashtme dhe të sigurisë së BE-së.
Kosovës i kërkohen hapa të mëtejshëm në funksionimin e sistemit të drejtësisë, respektimin e të drejtave themelore dhe zbatimin e obligimeve që dalin nga dialogu me Serbinë.
Një zhvillim pozitiv është vendimi i Komisionit Evropian për heqjen e masave ndaj Kosovës, pas ndryshimeve në qeverisjen lokale në veri të vendit. Ky vendim ka hapur rrugën për rifillimin e bashkëpunimit përmes mekanizmave të Procesit të Stabilizim-Asociimit dhe vazhdimin e asistencës financiare.
Komisioni Evropian ka shprehur gjithashtu gatishmërinë për të përgatitur opinionin lidhur me aplikimin e Kosovës për anëtarësim, nëse këtë e kërkon Këshilli i BE-së.
Zgjerimi, prioritet strategjik i Brukselit
Zgjerimi i Bashkimit Evropian në Ballkanin Perëndimor po merr rëndësi të shtuar strategjike, por vendet e rajonit po përparojnë me ritme të ndryshme.
Mali i Zi është më afër përmbylljes së negociatave, Shqipëria synon ta arrijë këtë objektiv deri në fund të vitit 2027, ndërsa Kosova vazhdon të përballet me pengesa politike dhe institucionale që po ndikojnë në rrugëtimin e saj evropian./Albinfo.ch
