Televizioni publik zviceran SRF ka testuar 12 vera të kuqe pa alkool nga Franca, Spanja, Italia dhe Zvicra, me ç’rast një produkt francez u shpall më i miri, ndërsa dy të tjera morën vlerësim të pakënaqshëm.
Testimi u realizua nga emisioni për mbrojtjen e konsumatorëve “Kassensturz”, përmes një paneli prej pesë ekspertësh, të cilët vlerësuan produktet në mënyrë anonime, duke u përqendruar te shija, aroma dhe ndjesia në gojë.
Vendin e parë e zuri vera franceze “Chavin Zéro”, me 5.5 pikë nga 6 të mundshme. Vlerësimin “mirë” e morën edhe vera zvicerane “Nullkommalenz” dhe ajo spanjolle “Natureo”, me nga 4.9 pikë.
Në anën tjetër, dy produkte nuk e kaluan testin. Vera spanjolle “El Coco Tinto” u kritikua për ëmbëlsi të tepruar, ndërsa vera italiane “Per Bene Primitivo” për aromën e tymit dhe aciditetin e pazakontë. Pas testimit, kompania Mövenpick vendosi ta tërhiqte përkohësisht nga shitja produktin “El Coco Tinto”, pasi analizat laboratorike zbuluan një seri me përmbajtje më të lartë të sheqerit të mbetur.
Sipas ekspertëve, cilësia e verërave pa alkool është përmirësuar dukshëm vitet e fundit dhe ato po shndërrohen në një alternativë gjithnjë e më të kërkuar. Megjithatë, theksohet se këto produkte mbeten kategori më vete dhe nuk mund të krahasohen plotësisht me verërat tradicionale që përmbajnë alkool.