Presidenti i Shqipërisë, Bajram Begaj, ka bërë thirrje për ruajtjen dhe promovimin e gjuhës shqipe, gjatë një bashkëbisedimi me të rinj nga treva të ndryshme shqiptare, në prag të Ditës së Alfabetit, përcjell albinfo.ch.
Në takim morën pjesë edhe Mevlan Ademi, kryetar i Lëvizjes Studentore në Maqedoninë e Veriut, dhe përfaqësues të grupit nismëtar të saj, të angazhuar në nismën “Foli Shqip o Taj”.
Begaj theksoi se gjuha shqipe është një nga elementet themelore të identitetit kombëtar dhe se ruajtja e saj kërkon përkushtim të përditshëm në familje, shkollë, institucione dhe në jetën e përditshme.
“Pa gjuhë, pa ‘Fol shqip!’ nuk ka atdhe, nuk ka Shqipëri, nuk ka shqiptari”, u shpreh presidenti.
Një vëmendje të veçantë ai ia kushtoi përdorimit të shqipes në Maqedoninë e Veriut, duke nënvizuar se të drejtat e garantuara nga Kushtetuta dhe ligji duhet të zbatohen edhe në praktikë.
Ai rikujtoi fjalimin e tij në shqip në Kuvendin e Maqedonisë së Veriut dhe takimin në Universitetin e Tetovës me përfaqësues të studentëve që protestonin për të drejtën e përdorimit të gjuhës. Begaj kërkoi që përfaqësuesit politikë shqiptarë, në qeveri dhe opozitë, të bashkëpunojnë për këtë çështje.
Duke përmendur Kongresin e Manastirit të vitit 1908, presidenti e cilësoi alfabetin e përbashkët si shembull të bashkimit të shqiptarëve rreth një çështjeje madhore kombëtare.
Ai solli gjithashtu shembullin e arbëreshëve të Italisë, të cilët kanë ruajtur gjuhën, kulturën dhe identitetin shqiptar për më shumë se pesë shekuj.
Në përfundim, Begaj i inkurajoi të rinjtë të vazhdojnë angazhimin e tyre dhe shprehu gatishmërinë për të mbështetur nismat për ruajtjen e gjuhës dhe kulturës shqiptare./Albinfo.ch