Skip to content

Shqipëria dhe Maqedonia e Veriut me një pikë kufitare

Sistemi i integruar “One Stop Shop” u inaugurua këtë të diel nga kryeministri shqiptar Edi Rama dhe homologu maqedonas, Hristijan Mickoski

Kufiri mes Shqipërisë dhe Maqedonisë së Veriut do të kontrollohet përmes një sistemi të ri me një ndalesë të vetme.

Me këtë strukturë, sigurohet një kalim më i shpejtë për qytetarët dhe mjetet e transportit përmes një kontrolli të koordinuar nga autoritetet e të dy vendeve.

Sistemi i integruar “One Stop Shop” u inaugurua këtë të diel nga kryeministri shqiptar Edi Rama dhe homologu maqedonas, Hristijan Mickoski, shkruajnë mediat në Tiranë, transmeton albinfo.ch.

Edi Rama, kryeministër i Shqipërisë: Deri tani në këtë doganë ishim ‘kontrollo, kontrollo’, tani jemi ‘beso, kontrollo’. Hapi tjetër është ‘beso, beso’ që të mos kemi më asnjë kontroll këtu në rrugëtimin tonë të përbashkët për t’u bërë pjesë e Evropës pa kontrolle kufijsh mes nesh.

Hristijan Mickoski, kryeministër i Maqedonisë së Veriut: Është kënaqësi që po bëjmë këtë bashkëpunim për një pikë kontrolli të vetme që lehtëson lëvizjen e njerëzve. Duam të përforcojmë bashkëpunimin edhe në pikat e tjera kufitare, bashkëpunime në Ohër Strugë nëpërmjet liqenit me Shqipërinë.