11 prill, nis dëgjimi i dëshmitarëve në rastin e ish-krerëve të UÇK-së

Më 11 prill në Gjykatën Speciale në Hagë pritet të nis dëshimi i dëshmitarëve të Zyrës së Prokurorit të Specializuar në rastin e ish-krerëve të Ushtrisë Çlirimtare të Kosovës.

Dhomat e Specializuara të Kosovës në Hagë, kanë bërë të ditur se në rastin ndaj Hashim Thaçit, Kadri Veselit, Jakup Krasniqit dhe Rexhep Selimit, nesër fillon procesi i paraqitjes së provave nga ana e Zyrës së Prokurorisë Speciale, respektivisht me dëgjimin e dëshmitarëve, shkruan gazetaexpress, përcjellë albinfo.ch.

Seanca pritet të nis në orën 9:30 e në Kosovë transmetohet 45 minuta me vonesë, përcjellë albinfo.ch.

Ndaj ish-presidentit të Kosovës, Hashim Thaçi, ish-kreut të Partisë Demokratike të Kosovës, Kadri Veseli, ish-anëtarit të Shtabit të Përgjithshëm të UÇK-së, Rexhep Selimi dhe ish-zëdhënësit të UÇK-së, Jakup Krasniqit rëndojnë akuzat për krime lufte dhe krime kundër njerëzimit.

Gjatë javës së shkuar nisi gjykimi ku u dëgjuan fjalët hyrëse të prokurorisë, mbrojtjes së viktimave dhe mbrojtjes së të akuzuarve.

Hashim Thaçi, Kadri Veseli, Rexhep Selimi e Jakup Krasniqi u deklaruan të pafajshëm, përcjellë albinfo.ch.