11-vjeçari kitarist, Evropiani i vitit

FB: European Union in Kosovo

11-vjeçari Ledion Halitaj së fundmi është vlerësuar nga Zyra e  Bashkimit Evropian në Kosovë me çmimin “Evropiani i Vitit”.

Ledioni thotë se në mbrëmjen e ndarjes së çmimit, kishte shumë njerëz që po e shikonin. “Por, nuk kishte problem. Më motivon shumë që të arrijë edhe suksese të tjera”, është shprehur ai për Radio Evropa e Lirë.

Fituesi zgjidhet përmes votave të publikut kosovar në rrjete sociale dhe Ambasadori i BE-së në Kosovë, Tomas Szunyog e 11-vjeçarin edhe fener shprese.

“Ky kitarist klasik 11-vjeçar, jashtëzakonisht i talentuar, është një model i vërtetë dhe një fener shprese. Më shumë të rinj kosovarë duhet ta zgjedhin artin si thirrjen e tyre”, u shpreh ambasadori, përcjellë albinfo.ch.

Dashurinë për këtë instrument, 11-vjeçari nga Prishtina e kishte prej se ishte shumë i vogël, ndërsa prindërit i bindi t’ia blinin një kur ishte rreth 9 vjeç.

“Kitarën e kam pasur qejf shumë dhe atë kitarë e kam mbajtur në katër festivale dhe pastaj e kam blerë kitarën e re”, tregon Ledioni për Radion Evropa e Lirë.

Në vitin 2020, Ledioni u regjistrua në shkollën private të muzikës “Beethoven” në Prishtinë, ndërsa në shtator të atij viti fitoi çmimin e parë në një festival ndërkombëtar të kitarës, i organizuar në Transilvani të Rumanisë, përcjellë albinfo.ch.

Karriera e tij shpërtheu me pjesëmarrje të shumta në festivale të ndryshme ndërkombëtare. Ai sot numëron 15 çmime nga këto festivale e tashmë po përgatitet për koncertet dhe festivalet me prezencë fizike. “Por, prej këtij viti po përgatitem për festivale të radhës [me prezencë fizike]”, tregon i entuziazmuar 11-vjeçari.

Ledioni vijon mësimet në klasën e gjashtë në Shkollën Fillore “Ismail Qemajli” në Prishtinë, ndërsa mësimet e kitarës i ndjek dy herë në javë.