Në një hotel në Himarë, zbulohen 422 kg drogë

Sipas Policisë së Shtetit, bëhet fjalë për 422 kilogramë e 300 gramë lëndë narkotike kanabis-sativa dhe një armë zjarri automatik, të cilat u zbuluan në orët e vona të mbrëmjes së të shtunës

Më shumë se 400 kilogram drogë janë zbuluar në një hotel në Himarë të Shqipërisë, në bregdetin jugor të vendit. Sipas Policisë së Shtetit, bëhet fjalë për 422 kilogramë e 300 gramë lëndë narkotike kanabis sativa dhe një armë zjarri automatik, të cilat u zbuluan në orët e vona të mbrëmjes së të shtunës.

Pas një hetimi intensiv, mbrëmjen e djeshme u finalizua operacioni i koduar “Hotel Room” (Dhomat e hotelit) në fshatin Piqeras të Himarës. Gjatë kontrollit të ushtruar në një nga dhomat e një hoteli, në administrim të Dhimitër Qëndros, në fshatin Piqeras, efektivët e policisë kanë gjetur lëndën narkotike dhe automatikun me dy karikatorë, raportojnë mediet shqiptare.

Në përfundim të hetimeve policia ka bërë të mundur kapjen dhe arrestimin në flagrancë si posedues të lëndës narkotike dhe armës së zjarrit Dhimitër Qëndro, 54 vjeç, banues në Piqeras.

Lidhur me këtë rast hetimet janë në vijimësi, ndërkohë që materialet i’u referuan Prokurorisë për veprat penale “Prodhimi dhe shitja e narkotikëve” dhe “Prodhimi dhe mbajtja pa leje e armëve luftarake dhe municionit”. Kjo është sasia më e madhe që është sekuestruar gjatë kësaj vere në bregdetin shqiptar.