18 të vdekur nga i ftohti në Amerikë

Moti i ftohtë që ka përfshirë Shtetet e Bashkuara të Amerikës, ka prekur më shumë se 100 milionë njerëz. Temperaturat në Nju Jork dhe Boston kanë arritur në -13 gradë Celsius.

Në malin Uashington në Nju Hampshër, që është goditur nga erërat me shpejtësi deri në 180 kilometra në orë, është shënuar temperatura e perceptuar prej -73 gradë Celsius, duke e bërë këtë territor njërin prej vendeve më të ftohta në tokë. Temperatura aktuale atje është -38 gradë Celsius, shkruan “Evropa e Lirë”.

Zyrtarë të aeroportit ndërkombëtar, John F. Kennedy, në Nju Jork, kanë njoftuar se po punohet me Administratën Federale të Aviacionit për t’i kufizuar fluturimet, për shkak të stuhisë që e kishte goditur këtë aeroport më 4 janar, përcjell albinfo.ch.

Gjatë pak ditëve të kaluara raportohet se nga moti i ftohtë dhe me borë kanë vdekur së paku 18 vetë.

Nga të vdekurit shumë prej tyre janë të pastrehë, derisa autoritet bëjnë thirrje që këto ditë qytetarët të jenë më të kujdesshëm dhe të kufizojnë lëvizjet.