34-vjeçari Gabriel Attal emërohet kryeministër i ri i Francës

Mediat franceze raportojnë se Gabriel Attal është emëruar kryeministri i ardhshëm i Francës, pasi Emmanuel Macron synon të “ringjallë” presidencën e tij me një qeveri të re, përcjell albinfo.ch.

Në moshën 34-vjeçare, ai është kryeministri më i ri në historinë moderne franceze, duke kaluar edhe socialistin Laurent Fabius, i cili ishte 37 vjeç kur u emërua nga François Mitterrand më 1984.

Attal zëvendëson Élisabeth Borne, e cila dha dorëheqjen pas 20 muajsh në detyrë.

Gjatë gjithë asaj kohe ajo luftoi me mungesën e shumicës në Parlament.

Gabriel Attal, i cili aktualisht është ministër i Arsimit, tani do të ketë detyrën të udhëheqë qeverinë franceze në zgjedhjet e rëndësishme të Parlamentit Evropian në qershor.

Ngritja e tij ka qenë e shpejtë. Dhjetë vjet më parë ai ishte një këshilltar i panjohur në Ministrinë e Shëndetësisë dhe një anëtar i socialistëve.