8-vjeçari i shkruan presidentit austriak: Pse emri Juaj është kaq i komplikuar?

I përgjigjet Van der Bellen

Është bërë virale: Për disa nxënës të shkollave fillore, emri i Presidentit të Austrisë është shumë i ndërlikuar, përcjell albinfo.ch.

Mediat austriake shkruajnë se, edhe pse emri i parë Alexander është mjaft i zakonshëm, mbiemri Van der Bellen duket pak më i vështirë.

Një emër i përbërë nga katër fjalë mund të duket shumë i komplikuar nga disa nxënës të shkollave fillore, veçanërisht kur janë duke u testuar.

Për tetëvjeçarin Milo nga Vjena ishte e vështirë të shkruhej një emër i tillë. Prandaj ai vendosi t’i shkruajë letër presidentit.

 

“I nderuar zoti President Federal,

Unë nuk mund ta shkruaja emrin tuaj në një test në shkollë. Pse emri juaj është kaq i vështirë?”, i shkroi ai presidentit.

Kjo pyetje presidentit i ishte bërë më shumë se një herë. Megjithatë, ai këmbënguli që t’i përgjigjej personalisht 8-vjeçarit Milo.

“I dashur Milo.

Faleminderit shumë për letrën e mirë. Pse është “e vështir? Epo, paraardhësit e mi emigruan nga Holanda rreth vitit 1700. Dhe, atje emra si Van der Bellen ose Van der Veen janë emra krejtësisht normalë, nuk janë të pazakontë. Por, nëse është shumë e ndërlikuar për ju, thjesht shkruani Sascha. Kështu më thërrasin miqtë e mi”, ia ktheu presidenti.

---