80 % e policëve kanë aplikuar për lotarinë amerikane

Sindikata e policisë vëren se 80% e efektivëve kanë aplikuar për lotarinë amerikane, ndërkohë që 70% familjeve të policëve jetojnë nën minimumin jetik

Përmes një letre drejtuar kryeministrit të Shqipërisë, Edi Rama, që mban datën 18 dhjetor, sindikata e policisë shqiptare paraqet disa kërkesa me karakter ekonomik.

Punonjësit e policisë së Shtetit i janë drejtuar Ramës me një shkresë, ku kërkojnë  plotësimin e 11 pikave. Ndër më kryesoret janë paga e 13 dhe pagesa e orëve shtesë.

Dokumenti mban datë 18 dhjetor. Shkresa u dërgua në emër të 7 mijë efektivëve, sipas të cilëve kushtet e vështira në punë janë bërë të papërballueshme për ata dhe familjet e tyre.

Efektivët e policisë pretendojnë se janë më pak të paguar në krahasim me homologët evropianë, ndërsa prej vitit 2014 paga e tyre nuk ka pësuar rritje, raporton “ABC News”.

Sindikata e policisë vëren se 80% e efektivëve kanë aplikuar për lotarinë amerikane, ndërkohë që 70% familjeve të policëve jetojnë nën minimumin jetik, thuhet në shkresë, përcjell albinfo.ch.

Punonjësit kërkojnë pagesën e dietave të prapambetura nga  2017. Por situata është edhe më alarmante për punonjësit e policisë së Tiranës. Orët suplementare nuk janë paguar nga viti 2016 për disa nga komisariatet, efektivët e të cilëve kanë qenë të pranishëm ne stadiume për ndeshjet kombëtare apo dhe të Superligës.

Një pikë tjetër në kërkesat e sindikatës së policisë drejtuar shefit të qeverisë është edhe sigurimi i jetës në rast aksidenti në punë dhe përfitimi i banesave falas për familjarët e policëve që kanë humbur jetën ne krye të detyrës.

Në pikën e fundit, kërkesa e përhershme e punonjësit e policisë: uniforma blu të sigurohet falas dhe zëvendësimi i saj të bëhet pa pagesë, gjë që nuk ka ndodhur deri tani.

Në fund të shkresës thuhet se është përgjegjësi e administratës së Ministrisë së Brendshme dhe  Policisë së Shtetit  që trupat policore te Shqipërisë ndodhen në këtë gjendje.

---