Anulohen 40 fluturime, paralizohet Aeroporti i Prishtinës

Zëdhënësja e Aeroportit të Prishtinës, Valentina Gara ka njoftuar se disa nga fluturimet janë dërguar në aeroportet fqinje, në Shkupit e Tiranë

Mjegulla e dendur që ka mbuluar sot Kosovën ka paralizuar tërësisht komunikacionin ajror, duke detyruar zyrtarët e Aeroportit Ndërkombëtarë “Adem Jashari” t’i anulojnë 40 fluturime. Ndërsa disa fluturime nga Gjermania që kanë pasur destiancion Prishtinën, kanë aterruar në Tiranë.

Zëdhënësja e Aeroportit të Prishtinës, Valentina Gara ka njoftuar se disa nga fluturimet janë dërguar në aeroportet fqinje, në Shkupit e Tiranë. Ajo tha se në Sllatinë ka shumë mjegull dhe kjo gjë mund të rrezikojë që të mos realizohet asnjë fluturim.

“Për sot i kemi gjithsej 63 fluturime. Prej tyre, 33 fluturime janë në arritje ndërkaq 30 fluturime janë në shkuarje. 40 fluturime janë të anuluara, 7 janë dërguar në aeroportet fqinje, në Shkup e Tiranës. Për sot janë në plan dhe 7 fluturime”, deklaroi Gara.

Një pasagjerë i cili nga Hanoveri kishte ateruar në Tiranë tha për Alabinfo.Ch se aeroplani pas përpjekjeve për të ateruar në Prishtinë, shkoj drejt Tiranës. “Tani jemi duke u kthyer nga autobus nga Rinasi. Është kogja sakrificë”, deklaroi ai.

Sipas këtij pasagjeri, kjo ishte hera e dytë që aeroplani u nisa nga Hanoveri drejt Prishtinës. “Herën e parë nuk arriti të aterroj dha u kthye mbara në Gjermani. Kompania kontraktuese na dërgoi me një hotel dhe jemi të kënaqur me trajtimin. Tani pas dështimit të dytë, aeroplani na dërgoi në Tiranë”, tha ai.

Ndërkaq që kompania “Euro Koha” ka njoftuar që është duke u përkujdesur për pasagjerët dhe se janë duke u bërë të gjitha zgjidhjet e mundshme. Në njoftim të kësaj kompanie thuhet se akomodimet e udhëtarëve janë duke u bërë dhe se janë në shërbim të tyre për 24 orë.