Kosovë, fëmija i parë lindë djalë

Fëmija ka lindur në Klinikën e Gjinekologjisë në Qendrën Klinike Universitare të Kosovës, ndërsa nëna e tij është 22-vjeçarja, Jetmira Sopjani

Fëmija i parë që ka lindur në minutat e parë të vitit 2016 në Kosovë është një djalë, me prindër nga Fushë-Kosova. Fëmija ka lindur në Klinikën e Gjinekologjisë në Qendrën Klinike Universitare të Kosovës, ndërsa nëna e tij është 22-vjeçarja, Jetmira Sopjani e cila sjell në jetë fëmijën e parë.

Sopjani, nëna e foshnjës së porsalindur, për emrin e të cilit nuk ka vendosur ende, tha se ndihet mirë me shëndet dhe shumë e lumtur, raporton KP.

Të pranishëm, për ta uruar nënën e foshnjës, ishin edhe drejtori i përgjithshëm i Shërbimit Spitalor Klinik Universitar të Kosovës, Curr Gjocaj dhe Lirije Beqiri, drejtoreshë e Infermierisë në QKUK.

Ndërsa to në mëngjes presidentja e Kosovës, Atifete Jahjaga e shoqëruar nga zëvendësministri i Shëndetësisë, Imet Rrahmani vizituan QKUK-në. Jahjaga vizitoi nënën që lindi fëmijën e parë ne vitin 2016 në këtë qendër, duke i dëshiruar jetë të gjatë dhe të lumtur djalit dhe nënës.

“Vizitova edhe nënën Jetmirën e cila kishte kaluar një lindje të mirë gjatë natës së mbrëmshme dhe e urova për lindjen e fëmijës. Po ashtu bebes së vogël i dëshirova jetë të gjatë, fat, shëndet dhe gëzime në jetën e tij së bashku me gjithë familjen e tij. Po ashtu shfrytëzoj edhe njëherë rastin që t’i uroj te gjithë qytetarët e Kosovës për një vit të mbarë dhe të suksesshëm”, tha Jahjaga.