Blocher jep dorëheqje nga posti i nënkryetarit të SVP/UDC-së

"Nga muaji prill nuk do të jem më nënkryetar i SVP-së», ka thënë Blocher. Dhe ka shtuar «unë i takoj gardës së vjetër».

Vetëm një ditë pas bërjes publik të vendimit për dorëheqje të kryetarit të SVP/UDC-së, Toni Brunner, dorëheqjen e ka paralajmëruar edhe nënkryetari i kësaj partie dhe ideologu i saj shumëvjeçar, Christoph Blocher.

Gazeta «Sonntagsblick» bën të ditur se doajeni i kësaj partie, politikani kontravers rreth 75 vjeçar do të japë dorëheqje nga posti i nënkryetarit të partisë, në muajin prill. Megjithëkëtë partia e Blocherit nuk ka dhënë ndonjüe konfirmim zyrtar të këtij lajmi, transeton albinfo.ch.

Ndërsa për gazetën e përmendur, Blocher ka thënë verç tjerash: «Nga muaji prill nuk do të jem më nënkryetar i SVP-së». Dhe ka shtuar «unë i takoj gardës së vjetër».

Me këtë veprim, Blocher po i jep fund funksionit të tij të fundit politik. Në vitin 2014 ai tashmë i kishte dhënë lamtumirën edhe Parlamentit Nacional, gjegjësisht detyrës së tij si deputet.

Njëkohësisht me Blocherin, dorëheqjen e ka paralajmëruar edhe nënkryetari tjetër i SVP-së, deputeti Walter Frey. Këtë e ka konfirmuar kryetari në detyrë, Toni Brunner. Por ky i fundit ka theksuar se nuk dëshiron që dy doajenët të largohen tërësisht. Ata, sipas tij i nevojiten partisë për të ruajtur kontinuitetin. Për Brunner-in Blocher-i është “një institucion në vete” dhe “ka ndikuar në politikën zvicerane më shumë se cilido politikan tjetër i vendit.