Skip to content

Në Zvicër po mbyllen gjithnjë e më shumë çerdhe, bie kërkesa për kujdesin ndaj fëmijëve

pixabay

Në Zvicër po shtohet numri i çerdheve që po mbyllin veprimtarinë, si pasojë e rënies së numrit të lindjeve, uljes së regjistrimeve dhe kostove të larta të operimit.

Sipas transmetuesit publik zviceran SRF, fenomeni po vërehet si në qytetet e mëdha, ashtu edhe në zonat rurale. Çerdhja “Giraffe” në Solothurn, pas 25 vjetësh veprimtari, ka vendosur të mbyllet për shkak të numrit të ulët të fëmijëve, ndërsa raste të ngjashme janë regjistruar edhe në kantonin Aargau. Në Bernë, dy çerdhe u mbyllën në muajin gusht për shkak të rënies së kërkesës.

Shoqata Zvicerane e Çerdheve, Kibe Suisse, vlerëson se në qytetet e Cyrihut, Bernës dhe St. Gallenit, numri i vendeve të ofruara për kujdesin ndaj fëmijëve tashmë e tejkalon kërkesën.

Sipas përfaqësuesve të sektorit, përveç ndryshimeve demografike, vështirësitë lidhen edhe me shpenzimet e larta për pagat, qiratë, sigurimet dhe ushqimin, si dhe me mungesën e personelit të kualifikuar. Çerdhet e vogla janë veçanërisht të prekura, pasi kanë më pak mundësi financiare për të përballuar periudhat me numër të ulët të fëmijëve.

Kibe Suisse u ka bërë thirrje autoriteteve që të investojnë më shumë në këtë sektor dhe të sigurojnë një planifikim të qëndrueshëm të kapaciteteve, duke ruajtur cilësinë e shërbimeve dhe mirëqenien e fëmijëve.

Ndërkohë, në Zvicër është duke u hartuar legjislacioni për një sistem të ndihmës financiare për familjet për shpenzimet e kujdesit ndaj fëmijëve, por ende nuk është përcaktuar se kur do të hyjë në fuqi.