Sigurohet mosha 60 vjeçare e pensionimit në ndërtimtari

Krahas moshës 60 vjeçare për pensionim (në degët tjera është 65), kjo marrëveshje siguron po ashtu edhe pagën minimale 5500 franga në muaj për muratorët dhe ndërtimtarët e kualifikuar

Të deleguarit e Federatës së Punëdhënësve në Ndërtimtari e kanë miratuar sot Marrëveshjen e Përgjithshme bazë (GAV) që rregullon raportet me  punëmarrësit (punëtorët) e ndërtimtarisë. Në të vërtetë marrëveshja ekzistuese,  është vazhduar deri në fund të vitit 2018.

Federata e përmendur, pas negociatave me sindikatat e vendit që kanë zgjatur shumë, ka arritur pajtimin për sigurimin e moshës 60 vjeçare të pensionimit në ndërtimtar, shkruan srf.ch. Kjo dhe ka qenë pika më e ndjeshme, më neuralgjike për të cilën kishte më shumë vështirësi pajtimi.

Para rreth dhjetë vitesh sindikatat e ndërtimtarisë kishin arritur të realizonin këtë të drejtë, e cila konsiderohet si një ndër të arriturat më të mëdha të punëtorëve në Zvicër. Ndërkohë, vazhdimi i zbatimit të kësaj të drejte të fituar, kishte filluar të vihej në pyetje nga punëdhënësit,  transmeton albinfo.ch

Këtë marrëveshje më parë, nga mesi i dhjetorit të vitit të kaluar e kishin miratuar sindikatat dhe kishte mbetur edhe miratimi nga ana e punëdhënësve, i cili u bë sot.

Marrëveshja bazë për degën e ndërtimtarisë është më e volitshmja në mesin e të gjitha marrëveshjeve që gëzojnë punëtorët në çfaredo dege. Krahas moshës 60 vjeçare për pensionim (në degët tjera është 65), kjo marrëveshje siguron po ashtu edhe pagën minimale 5500 franga në muaj për muratorët dhe ndërtimtarët e kualifikuar të rrugëve si dhe pagën minimale prej 4500 frangash për punëtorët pa kualifikim profesional