Azilkërkuesve do t`u konfiskohen paratë për të mbuluar shpenzimet e azilit

Me këtë rast konfiskohen paratë dhe gjësendet me vlerë si dhe kursimet në banka. Shuma të cilën azilkërkuesit mund ta mbajnë për vete nuk bën të jetë më e lartë se 1000 franga

Autoritetet zvicerane kanë të drejtë që azilkërkuesve t`ua ndalin paratë që posedojnë, në mënyrë që me to të ndihmohet financimi i procedurës së azilit ose për të kthyer shpenzimet që entet sociale kanë bërë për ta.

Sipas emisionit «10vor10» të transmetuesist publik të Zvicrës, kjo praktikë ka filluar të futet në rregulloret e punës të qendrave për pranim të azilkërkuesve në gjithë Zvicrën. Me këtë rast sipas ligjit, konfiskohen paratë dhe gjësendet me vlerë si dhe kursimet në banka. Shuma të cilën azilkërkuesit mund ta mbajnë për vete nuk bën të jetë më e lartë se 1000 franga.

Për mbulimin e shpenzimeve të shkaktuara shërben po ashtu edhe i ashtuquajturi kontribut i veçantë, i cili u ndalet azilkërkuesve nga paga, në rast se punojnë. Bëhet fjalë për shumën prej 10% nga paga dhe ajo përqindje u hiqet deri sa të mbërrijë në vëllimin prej 15 mijë frangash.