Molotovi “tremb” investitorët e huaj

Pamjet nga protestat e dhunshme të opozitës me koktej molotovi, po ndikojnë negativisht në investimet e huaja, deklaroi ministrja kosovare e Tregtisë, Hykmete Bajrami

Pamjet e vitit të kaluar nga Kuvendi i Kosovës me gaz lotsjellës dhe protestat e fundit me koktej molotovi, do të ndikojnë negativisht tek investitorët e huaj. Kështu konsideron ministrja e Tregtisë dhe Industrisë (MTI) në Qeverinë e Kosovës, Hykmete Bajrami, e cila të arriturën më të madhe të vitit të kaluar e konsideron MSA-në me BE-në.

Bajrami megjithatë thotë se është bërë punë e madhe në aspektin ligjor sa i përket kushteve për investime. Ajo përmendi paketën e re fiskale, e cila shkon në favor të bizneseve, ndërsa rezultati i saj, siç tha Bajrami, është parë vitin e kaluar me rreth 300 milionë euro investime të huaja.

Por, ajo fajëson pamjet nga protestat e dhunshme të opozitës se po ndikojnë negativisht në ekonomi, sidomos në investimet e huaja.

“Pamjet me koktej molotovi, gazi lotsjellës, flaka, tymi në ndërtesat qeveritare, djegia e veturave të MTI-së që është adresa e parë për investitorët që vijnë në Kosovë, thyerja e xhamave, të gjitha këto, shkatërrimi i aseteve publike… patjetër që kanë ndikim negativ”, thotë ministrja Bajrami për Ekonomia Online.

Këto pamje, sipas saj, kanë marrë dhënë, kanë qenë nëpër ekrane më prestigjioze të televizioneve botërore dhe kanë pasur impakt negativ.

“Shpresojmë që edhe komuniteti i biznesit të na bashkohet, por dhe opozita t’i thërrasë mendjes që t’i kthemi dialogut, për shkak se dëmi mund të jetë më i madh sesa përfitimet e kujtdo qofshin”, deklaroi Bajrami, e cila e vlerëson si të arritur të madhe Marrëveshjen e Stabilizim Asociimit (MSA), sidomos në aspektin politik.