Shumica pro “Iniciativës për zbatim” vjen duke rënë

Në favor të saj do të votonin 51 për qind e votuesve. 42% do të votonin kundër ndërsa 7% do të ishin të pavendosur

Sikur te ishte votuar më 12 janar, iniciativa e SVP/UDC-së «Për jetësimin e dëbimit të të huajve kriminelë», në favor të saj do të votonin 51 për qind e votuesve. 42% do të votonin kundër ndërsa 7% do të ishin të pavendosur. Në fakt, 31% të të anketuarve janë “të sigurt pro iniciativës” dhe 31% “të sigurt kundër” saj. Mirëpo kategoria e atyre që janë “më shumë për iniciativën” është më e madhe, gjegjësisht 20%, ndërsa e atyre që do të ishin “më shmë kundër” saj është 11%.

Kjo tregon një ulje të vogël në krahasim me sondazhin e kaluar, kur pro iniciativës ishin 55%.

Sondazhin e ka realizuar Instituti për hulumtimin e opinionit SRG, njofton srf.ch. Sipas tij, 80 për qind e të anketuarve kanë thënë se do të votojnë njësoj sikur në votimin «për dëbimin e të huajve kriminelë» që është bërë para pesë vitesh. Mosjetësimi i kësaj iniciative, sipas SVP-së i ka shtyrë ata që ta iniciojnë iniciativën për jetësim, e cila është më e ashpër se e para.

Shikuar sipas përkatësë partiake të votuesve, në favor të kësaj iniciative do të votonin 89% të anëtarëve të SVP/UDC-së. Në mesin e anëtarëve të FDP-së, pro iniciativës do të votonin 46 për qind ndërsa kundër saj, 42%. Ndërsa me shumicë të qartë kundër iniciativës do të votonin SP/PS (76%) dhe të Gjelbrit (71%). Edhe te CVP/PDC do të arrinte një shumicë numri i kundërshtarëve të iniciativës (55%).

Ndonëse është spekuluar shumë, hulumtuesit nuk kanë gjetur ndonjë ndikim të madh në disponimin e votuesve të mundshëm të ngacmimeve seksuale mbi femrat gjermane, të bëra në Natën e Vitit të Ri në Köln. Se është kështu, tregon fakti se as numri i femrave që mbështesin iniciativën nuk është dukshëm më i madh dhe as numri i meshkujve që e kundërshtojnë atë nuk është dukshëm më i madh se sa në sondazhet e realizuara para incidentit.