25 mijë franga maksimumi për kompensimin e “fëmijëve robër”

Llogaritet se sot jetojnë ne mes 12.000 dhe 15.000 persona që mund të kenë pretendime për kompensim si ish «verdingkinder»

«Verdingkinder», është emërtimi për një kategori fëmijësh të trajtuar keq, e njohur në praktikën zvicerane deri në vitet `60 të shekullit të kaluar. Bëhet fjalë për fëmijë dhe të rinj pa prindër apo që u janë marrë prindërve të gjykuar si të papërgjegjshëm dhe u janë dhënë në dorëzim familjeve kryesisht bujqësore. Këto të fundit në shumë raste i kanë (keq)përdorur ata në punët e rënda ose i kanë keqtrajtuar në mënra të ndryshme.

Pas një lufte disavjeçare të «verdingkinder»-ëve ose të pasardhësve të tyre, Qeveria e Zvicrës vitin e kaluar pati marrë vendim për t`i zhdëmtuar ata për keqtrajtimin e pësuar. Për të gjithë ata ishin caktuar 300 milionë franga dhe është vendosur që për person të ndahen maksimalisht 25000 franga. Kështu ka vendosur Komisioni Financiar i Dhomës Nacionale të Parlamentit të Zvicrës. Ai, me 15 vota pro dhe 8 kundër i ka rekomanduar Komisionit juridik që kjo shumë të jetë maksimalja që mund të jepet për zhdëmtim, njofton shërbimi për medie i parlamentit.

Llogaritet se sot jetojnë ne mes 12.000 dhe 15.000 persona që mund të kenë pretendime për kompensim si ish «verdingkinder».

Ata kishin kërkuar që shuma e cila do t`u ndahej si kompensim të jetë 500 milionë franga.