11 ish ministra federalë, me manifest kundër “Iniciativës”

Është përpiluar një manifest kundër iniciativës të cilin e kanë nënshkruar 11 nga gjithsej 18 ish anëtarët ende të gjallë të Qeverisë Federale të Zvicrës

Rezistenca kundër iniciativës së SVP/UDC-së për “zbatim të dëbimit  të të huajve kriminelë” është më e madhja në historinë e re të inicativave popullore në Zvicër. Këtë e ka konstatuar edhe Christoph Blocher, ideologu dhe ish kryetari i SVP-së.
Kështu, janë themeluar dhe aktivizuar gjithandej komitete dhe grupacione tjera në baza partiake, shoqërore, profesionale, nga ekonomia  etj. që të luftojnë kundër inicativës, në favor të të cilës duket se ka mbetur vetëm SVP-ja. Megjithatë, në sondazhet e ndryshme del se iniciatorët kanë ende një epërsi, ndonëse jo të madhe, ndaj kundërshtarëve.
Së fundi ka bërë bujë një manifest kundër iniciativës të cilin e kanë nënshkruar 11 nga gjithsej 18 ish anëtarët ende të gjallë të Qeverisë Federale të Zvicrës, bën të ditur srf.
Me këtë rast ish ministri nga FDP/PLR, Pascal Couchepin citohet të ketë thënë se Iniciativa vë në lojë ose rrezikon shumëçka të arritur në Zvicër. Ndërsa ish ministri tjetër, nga SP/PS, Moritz Leuenberger ka tërhequr vërejtjen se “kështu po hidhen poshtë parimet e rëndësishme të demokracisë sonë të drejtpërderejtë. Prandaj jam ndjerë i detyruar të aktivizohem”, ka thënë ai.
Nga ana tjetër, 273 ish parlamentarë dhe pjesëtarë të sotëm të Parlamentot Nacional kanë nënshkruar tashmë manifestin e titulluar “Parlamentarët kudnër Iniciativës për zbatim”.